انا خايفه

أنا خــــايفة



أنا خــــايفة
ده مش مجرد عنوان يشدكم
لاء بجد انا خايفه جدا

ومين فينا مش خايف !!

مين مش خايف على نفسه وعلى اهله ؟؟
مين مش خايف من بكره واللى ممكن يحصل فيه ؟؟
مين مش خايف يفقد اعز واحب الناس ليه ؟؟
مين مش خايف يضيع عمره فى الفشل ؟؟

اكيد كل واحد فينا خايف من حاجة

طيب هسأل سؤال تانى مالوش علاقه بالاول بس استحملونى

ايه اللى شاغل بالك ؟؟

* * عاوز تأمن مستقبلك ومستقبل اولادك.
* * عاوز تكون انسان ناجح فى حياتك وفى شغلك.
* * عاوز تكون صاحب سلطه ونفوذ الاهم طبعا صاحب مال.
* * عاوز تبنى بيت واتنين وعشره.
* * عاوز ...عاوز ... عاوز ... محدش فينا هيقول خلاص كفايه.

أنا خــــايفة
يعنى خايف من او على
ومشغول وسط الدنيا
وعاوز كل حاجه

طيب فى وسط ده كله فكرت للحظه
ان المفروض تخاف على نفسك وبس
اه خاف على نفسك وبس
مين هيقول دى انانيه
ايوا بالظبط كده دى انانيه
وانا بطالب بالانانيه
يوم لاينفع فيه مال ولا بنون

فاكرين سؤالى الاول
أنا خــــايفة
طيب مين فينا مش خايف من

..... المـــــــــــوت .....

بس الخوف من الموت بيختلف من انسان عن التانى
يعنى هتخاف تموت علشان حياتك واولادك وفلوسك
ولا هتخاف علشان هتتحاسب على كل صغيره وكبيره !!

طيب اعتقد لحد دلوقتى الاسئله اللى بسألها طبيعيه ومنطقيه كلنا خايفين نموت ...
طيب السؤال اللى مش طبيعى بقى

جاهزة تموتى ؟!!
انت جاهز تموت ؟؟

* سؤال غريب بس لو اتسألته هتجاوب تقول ايه ؟؟

* طيب جاهز تتحاسب ؟؟
* جاهز تدخل قبرك ويتقفل عليك وينصرف عنك الاهل والاحباب ...؟؟
* جاهز لنعيم او لهلاك ؟؟
* جاهز تقف قدام ربنا وتاخد كتابك بيمينك او بشمالك ؟؟


(( اللهم يمن كتابنا ويسر حسابنا ))

ها ... حد يرد عليا

عاوزه واحد بس يطلع يقولى اااااه انا جاهز للموت وجاهز للحساب كده بكل ثقه...

كتير ممكن يكونوا مش خايفين من الموت
لانه قضاء ربنا والحمد لله كلنا مؤمنين بيه

ومسلمين لقضاء الله

* بس حد جاهز فعلا !!


* بتصلى ... بتصوم ... بتزكى .. اديت العمره والحج
برااااافو عليك .... (طيب يالا جاهز!!)

طيب قبل ماترد على سؤالى
اقرأ اللى جاى كده وبعده هسألك نفس السؤال

* قاعده الحريم او الرجاله مش فارقه كتير
بتحلى غير بسيره الناس ؟؟
طيب بطلتو غيبه ونميمه علشان تبقو جاهزين للموت!!ده حتى يأأخى
مش راحمين نفسهم ده حتى مكروهـ تتكلموا مع حد فى المسجد بيت ربنا

للصلاه والذكر بسـ


أنا خــــايفة

* صباح الخير ياحبيبتى ايه مش بشوفك ليه وحشانى موت
واول ماتسيبها تقول لصاحبتها يااااه دى بت خنيقه اوى وعلى قلبى زى السم
بطلتى نفاق علشان تبقى جاهزه للموت !!

ياجماعه والله انا قلبى وجعنى اوى

أنا خــــايفة

* شوفتى فلانه شايفه بيتها عامل ازاى
ولا جوزها انا عارفه بيحبها على ايه
صحيح ناس ليهم بخت
بطلتى غيره وحسد علشان تبقى جاهزه للموت !!


أنا خــــايفة

* بقولك ياماما انا هنزل اروح لـ سمر
علشان عيانه اوى ولازم اطمن عليها
الو ايوا ياسمر اوعى تتصلى فى البيت انا قايلالهم انى عندك وانك تعبانه علشان لو ماما سألتك
بطلتى تخونى الامانه علشان تبقى جاهزه للموت !!



أنا خــــايفة

* مبقاش الا دا اللى تساوية بيا
ازاى يعنى يترقى وانا اقدم منه وخبره عنه
يا أنا ياهو فى الشغل ده
بطلت غرور وتكبر علشان تبقى جاهز للموت !!


أنا خــــايفة

* يوووه بقولك ايه انا جايه من الشغل تعبانه ومش ناقصاك
بطلتى تعصى جوزك علشان تبقى جاهزه للموت !!


أنا خــــايفة

* انتى مجيتيش ليه امبارح يابنتى استنيتك كتير
معلش ياساريـه اصلى كنت تعبانه ومقدرتش انزل معاكى .. وهى اصلا كانت خارجه مع واحده تانيه
طيب بطلتى تكدبى علشان تبقى جاهزه للموت !!


أنا خــــايفة

* اووووف بقى ياماما هو مفيش غيرى انا فى البيت
ماعندك كلهم قاعدين اهم ماليش دعوه بقى
بطلت تعصى ابوك وامك علشان تبقى جاهز للموت !!


أنا خــــايفة

* مش فاطمه زعلانه منى ومخصمانى ماتصالحينى عليها
تصالحيها ايه يابنتى بطلى الهبل ده سبيها تخبط راسها فى الحيطه بقى تبقى هى الغلطانه وانتى اللى تروحى تصالحيها كده ميبقاش عندك شخصيه
بطلتى توقعى بين المسلمين علشان تبقى جاهزه للموت !!


أنا خــــايفة

* ايه يابنتى ده لبسك ضيق اوووى
وايه المهرجان اللى فى وشك ده
يوه ياماما ما كل البنات كده اشمعنا انا
انتم هتعقدونى انا لسه صغيره
(اصل الموت بيفرق بين صغير وكبير)
بطلتى تقتدى بالاسوء علشان تبقى جاهزه للموت !!


أنا خــــايفة

الامثله كتيييييييير ولو قعدنا نعدها مش هتخلص
حاجات كتير فى يومنا بنعملها واتعودنا عليها
وبقت بالنسبه لينا عادى جدا مفيهاش اى حاجه

أنا خــــايفة
ومتنساش بعد الامثله دى كلها وبعد كل الكلام ده
اللى ممكن اوى يدخل من هنا ويطلع من هنا
ان فى حاجه اسمها رد المظالم
اى واحدة او واحد اغتابتوهم
اى واحده او واحد ظلمتوهم
اى واحده او واحد خوضتو فى عرضهم
اى واحده ضحكت عليها
كل ده موجود ومكتوب عند ربنا وحسابك فى الدنيا والاخره عسير

أنا خــــايفة
هسألك بقى سؤال اخير بس تجاوب بصراحه

ولو حتى بينك وبين نفسك ومتكدبش على نفسك

لو مثلا عرفت انك هتموت وانك هتدخل الجنه وتتمتع بنعيمها ان شاء الله

بس فى شرط واحد بس

قبل ماتموت لازم تروح لكل واحده او واحد اغتبتهم

تقوللهم انا قولت عليك كذا وكذا وسامحنى

تفتكر هتقدر ... مش هتتكسف من نفسك ... مش هتندم ..

طيب مكسوف تروح تقولهم يبقى بتتكلم عليهم من الاول ليه اصلا ومكسوف منهم
ومش مكسوف من ربنا اللى خلقك...

الموضوع ده اظن محتاج وقفه جامده مع النفس واعاده تفكير وتغيير السواد اللى فى القلوب



أنا خــــايفة
مش معنى الكلام ده انى بلا عيوب
لا طبعا كلنا بنغلط بس بتفرق امتى ؟
بتفرق من اللى بيعرف غلطه وبيصلحه
واللى مش مقتنع انه غلط اصلا


أنا خــــايفة

مش معنى انى بصلى وبصوم وبزكى و...و...و..
يبقى انا كده تمام صحيح انا احسن من غيرى كتير

لسه مبدؤش .. لسه مبيصلوش .. لسه محتاجين صدمه تفوقهم

والمشكله انهم عارفين ان الصلاه عماد الدين من تركها ترك الدين وبيسيبوها للاسف الناس دى بقولهم بجد فوقوا

مفيش احلى من القرب من ربنا

جرب كده وهتشوف الفرق فى حياتك وفى اولادك وفى زواجك
او لسه ربنا هيرزقك بيه

هنتغير للاحسن وهنلغى اى سلوك وحش من حياتنا

اى سلوك نهانا عنه ربنا اللى بيحبنا

واللى مفيش حد فى دنيتك دى

حتى ابوكى وامك هيخاف عليك

وهيبقى حنين عليك وهيحبك تقربله

وهيفرح برجوعك له الا ربنا احسن من الخلق اجمعين ..

وقف شيطانك وابدء

وقولو هبقى احسن

اوعى تتردد يمكن نيتك للتغيير دى تشفعلك عند ربنا لو قبض روحك دلوقتى.

*دعوه لغلب الشيطان.
*دعوه للقرب من ربنا.
*دعوه لتحسين الاخلاق.
*دعوه من قلب صادق بيحبكم

عايزة ربنا يظلنا يوم لاظل الا ظله وينادى علينا اين المتحابون فى جلالى
نرد ونقول احنا يارب اجتمعنا على طاعتك فى الدنيا
فيجمعنا فى جنته وينعمنا بها فى الاخره

جاهزه تموتى .... !!!
جاهز تموت ....!!

ده سؤالى ليكـم بعد ماقرأتم كلامى؟